John Siamkunga Ex-MLA chuan, “ZPM sorkar hian Biak In chhuhsak a tum tlat hi mumangah pawh thleng se kan duh loh a ni. Helai hmun hi ZPM Party office atan an itna hi ala reh lo va, kohhran pawh an nep zo lo hi a zahthlak hle a ni. Ram dangah chuan Biak In mai ni lo, sikul te, damdawi In te leh vantlang hmun pawimawhte hi zah thin a ni a. Sorkar hian Biak In hmun turte a pe zawk thin a ni," a ti.

John Siamkunga chuan, he Biak In hmun hi kohhran hnena Bawrhsap LL Peters pek a ni a. Kum 1948 ah a hmun lai zawlin Biak In sak a ni a, kum 1950 ah Dawrpui Pastor Bial in a hawng a. History chhui pawhin Synod ta a ni a, chhuhsak an tum tlat hi a luhai thlak hle a ni. He Biak In hmun hi India pian tirh ata Presbyterian Kohhran ta a ni a. Biak In chhuh sak an tumna hi keini Congress party chuan kan do zel dawn, a ti.

"Tuna kan CM hian dictator angin a inhmu a, mipui min mamawh tawh lo a, khua leh tui ten sawi tur kan nei tawh lo a ni. Opposition min ngaithei tawh lo, ZPM MLA 27 te nen rorel thei tawkah a inngai a, opposition ngaithei miah lo, an mahni dip thei tu apiang thai bo tum zel ang kha a ni," tiin a sawi bawk.

Tuna rorel lai ZPM hian Lengpui Airport hi Indian Airforce kuta hlan a tumna hi a la ngai reng a. Airport ram bul lawk ram chu airforce te hnenah hian an hralh tawh bawk. Engvangin nge kan tualto party te hian kan ram aiin sum an ngaina zawk a, ram hi kan dah hmasa zawk dawn lo’m ni tiin kan zawt a. Airport chungchang hi Congress chuan kan la sawi dawn chauh a. Ram an hralh mai mai hi keini Congress chuan kan duh lo, a tawp thlengin kan do dawn a ni, a ti.

Tuna kan sorkar hrawn mekte hian Forest Conservation Amendment Act hmangin kan ram hi a hralh a, opposition a nih laiin a that lohna zawng zawng a sawi nasa em em a, tunah a thatna lai ringawt a zawng leh ta hi a mak hle. Hetianga dan kan nei a nih tawh chuan Central lam hi an duh dan danin an rawn che tawh dawn a, min rawn tawh dawn lo, a ti a

"Thil pawimawh bik an tihah chauh min rawn dawn a. Kan ram hi kan ram a ni tawh lo hi a pawi hle a ni. Chuvangin FCAA hi revoke turin special assembly nei turin Congress chuan kan nawr a nim Ram hralh mai mai hi kan duh lo, Congress chuan a tawp thlengin kan do dawn a ni," John Siamkunga chuan a ti.